Ratok Anak Dagang

Tanggi malanjuik lah kau batuang
buliah nak nampak dari jauah
Tinggalah dulu samantaro oi kampuang
dagang lah sarek di rantau jauah

Ramo ramo si kumbang jati
tabang malayok ka kabun angrek
Urang ka kampuang siliah baganti
tibo di badan kini sadang sarek

Bukik banamo gunuang ameh
tampek urang pai ka rimbo
Sanang alun lai tantu seso lah jaleh
pantang di dagang ba putuih aso

Ka ilia ka kampuang jao
kamudiak ka ulu banda
Bialah dulu iduik co iko
untuang kok isuak lai barubah

Anak urang sabuak andaleh
nan karimbo pai barotan
Kok lai mujua bundo malapeh
bak ayam pulang ka pautan